Luke 5

Jisas kandja djika Pita pis merke toi

(Matyu 4.18-22 ne, Mak 1.16-20)

1Kune ge Jisas nu erim Genesaret djeke aglo moika, una merke po gull bolo i pakna wori, une God kandjiye djinda pupon dje pille ye moi. 2Jisas molo kani, kanu soka iwo nu erim djeke wori pa mopill. Pagi una yenekne pis kon was ye, amblo ye wopake yembon dje pille er pi pai. 3Jisas Saimon kanuye al po pakna molo Saimon moi al embe dji, ni kanu ker ta amblo tangill to ipo nu erim djeke worben panda we dji. Jisas pakna ami dje molo kandja dje una awi.

4Jisas kandja dje awo kere, une Saimon moi al embe dji, ni agan kambono boll pis kon ipo nu mur moro al worneke, pis tambon we dji.

5Djika Saimon embe dji, Iwa Kerman, no imina pis tambon dje ye pupin tagi, ta natopin. Kerbon ba alla, ni ipon kandja djinden pille, na pis kon alla nu al woro kanno we dji. 6Kambono kon ge nu al kal wormaka, pis merke wo kon al puka to molmaka, kon ge tup djino dje yei. 7Pita age kambono pende boll aglene as yemaka, kogo aike ye wani una pende kanu al moi ge, kane manda wo pis i kanu soka dakale papill al wori, kanu soka aike pis puka toika, er nu guloto bell mal pai. 8Pis merke tomaka, Pita ga aike wani una ge kane, kand kerman golmaka, Saimon Pita po Jisas kake al gopye boglo awo embe dji, Iwa Kerman, na singare ke yell una moro, ni na kere er piye! dji.

10Pita kogo aike ye wani una soka Sebedi wariye Jems ne Jon para kane kand gopillka, Jisas Saimon moi al embe dji, ni kand nagole! Ipon manda pis iden mal embe, ni are po una dje i pakna worben we dji.

11Djika kambono kanu ipo orko woro kere, wal porapora moi ge kere, Jisas boll aike er pi.

Jisas wo iwa ta kenj toi i gun woro awi

(Matyu 8.1-4 ne, Mak 1.40-45)

12Kune ge Jisas po dumo ta yei al wanmoika, gakle kenj toi iwa ta wo Jisas moi al gopye boglo taimagaus pa molo kamang ye embe dji, Iwa Kerman, ni kune we djimbenka, na gaklena al djengimb moro ge pora djindaka God nale al kiwa moyoba dji.

13Djika Jisas iwa ge gakle al amblo embe dji, na kune we djindo. Ni gaklen al djengimb moro ge pora djinda we dji. Djika ke kenj toi pai ge kune taimane pora djika, kiwa moi. 14Jisas kandja dongall dje iwa ge awo embe dji, ni na embe yendo we nadjiye! Ni po gaklen al ombine dje aumbenka, opa gale awinj una kanne we dji. Asa una gaklene kiwa yei kune ge, Mosis kane, ye opa ta yene we dji. Dji mal ge ni po opa embe gale aumbenka, ni gaklen kiwa yero mal una kanne we dji.

15Jisas yene man dji ba, une yei mal ge una kane kandjambe to wai djimaka, una merke pille Jisas kandja djinda pupon dje womaka, ke toi pai una i gun worda dje womaka embe yei. 16Una embe woi ba Jisas kune merke kere, er dumo wapra yei al po kamang yei.

Iwa ta kake agle golo ke yei Jisas i gun woro awi

(Matyu 9.1-8 ne, Mak 2.1-12)

17Kune ge Jisas kandja dje moi al ge, Parisi una ne, God lo dje awi una aike wo ami dje pille moi. Kambono distrik Galili ne, distrik Judia dumo ker ker pakna yero ge ne, Jerusalem kere er woi. God yembe dongall ge Jisas boll moika, una ke toi moi ge une ye wopake ye awi. 18Embe yeika iwa ta kake agle goi una ge, una pende tublo i numog po Jisas moi al kal worbon dje yei, 19ba una merke molmaka, dumo sill dje keri, kond ta nayei. Kake agle goi iwa ge una tublo i pla po, numb be donab sellki. Una numog molo kanmaka, kake agle goi iwa ge palbam boll kise dje Jisas gume al kal wori. 20Kambono pillgi pai ge Jisas kane, kake agle goi iwa pai al kandja embe dji, agana, ni ke ye wanin ge na kere aundo we dji. 21Djika God lo dje awi una ne, Parisi una ellne kumbsika, yenekne kandja dje pille embe dji, une ge ne mal molo God kandjiye abro ne? dji. God taimane una singare ke ye waninj ge kere aunda ba alla, une djindo ge kune nayendo we dji. 22Kambono nomane embe paika, Jisas pille embe dji, ye namba yei pille kandja ge nomane al pai djinj ne? 23Une ge singare ke ye wani na kere aundo mal ge ye kanne kune nayendo. Ba na djinaka une agle kond er wo punda ge, ye kanne kune yenda. Embe yeno ge ye kanne, na Una Wombe moro ge na namba paro, una singare ke ye waninj na kere auno ge kune yendo we dji.

Jisas kandja embe dje kere kandja dje kake agle goi iwa moi al awo embe dji, ni agle! Palbam amblo i er numbin al piye! dji.

25Jisas kandja embe djika una kanmolmaka, kake agle goi iwa ge, ola dje aglo molo palbam amblo i. God kandjiye amblo pla woro, er yene numbiye al pi. 26Er pika una porapora aya dje, kand kerman golo, God kandjiye amblo pla woro embe dji, ipon wal ta mal ta yei kanmon we dji.

Jisas djika iwa Lipai woika aike er pupill

(Matyu 9.9-13 ne, Mak 2.13-17)

27Jisas po kani ku takis i una iwa kandjiye Lipai we dji ge wo takis numb numog moi. Moika Jisas po embe dji, ni na wondo al er we! dji. 28Lipai wal porapora moi ge kere er woika, Jisas boll aike er pupill. 29Soka po Lipai numbiye al pupillka, Lipai Jisas pille kwa mokna kerman gale djika una merke woi. Ku takis i una ne, una pende kiwa moi una ge porapora womaka, soka boll aike kwa no moi. 30Kambono kwa no molmaka, Parisi una ne, yenekne unakne God lo dje awi una ye molo Jisas kogoye una kambono moi al po Jisas kandjiye amblo embe dji, ye namba yei pille ku takis i una ne, singare ke ye waninj una boll aike kwa ne, nu no mor ne? dji.

31Jisas embe dji, man, una kiwa mor ge dokta mor al napij, una ke tondo una ge dokta mor al pinj we dji. 32Una wopake mor una nomane ake tane dje pille na nawoll. Na woll ge singare ke ye waninj una nomane ake tane dje pille woll we dji.

Juda una God pille kwa mokna mapill yei

(Matyu 9.14-17 ne, Mak 2.18-22)

33Una pende embe dji, Jon kogoye una ne, Parisi kogoye una mor ge God pille, kamang ye, kwa mokna mapill kune merke yenj we dji. Ni kogen una kwa ne nu eri nonj ge kune nayendo we dji.

34Jisas kandja buko ta dje yem woro embe dji, iwa ta ana ino dje yenda ge, una merke kwa nane we djindaka, una wo kwa mapill yene mo? Ge man, nayene we dji. 35Are una wo iwa ge to i er pine kune ge, kambono wandill kerman golo kwa nanane we dji.

36Jisas kandja buko ta embe dji, una kon pakna kindja ta yendaka, i to ball dje kon pakna gole yenda boll to boye ge kune nayendo. Embe yene ge kon pakna kindja ge ye ke yene. Kon pakna kindja gole boll aike to boye ge una kanne kune nayendo we dji. 37Una wain megye nuye kindja i kog meme gakle kon gole segi dal kune nayenda. Kon gole ge, wain nuye yake kerman pundaka, kon billa djinda. Wain nuye tulu dje er kal makimb al pundaka, kon ke yendaka embe yembell. Una embe nayene. 38Kon kindja i wain nuye kindja segye ge kune yenda we dji. 39Wain nuye asa yei ge una no kere, wain nuye kindja nambon we nadjine we dji. Embe djine, wain nuye asa ye moi ge no nopin abi we djine we dji.